أهلا بيكم في في دورة الربيع 2020 الجديدة من “سكة معارف” و اللي ح يكون عنوانها الكبير هو “سر الصنعة” و هندخل فيها مع بعض المطبخ ونتعرف سوا على شوية من أصول الصنعة في مجالات مختلفة من العلوم الاجتماعية والإنسانية. كل مرة هنقرا مقالة أو مقالتين و هيكون معانا الكاتب اللي هيحكيلنا عن المنهج اللي استخدمه و خطوات البحث و الكتابة اللي اتبعها و كمان هيشاركنا عيّنة من المادة الأولية اللي استخدمها في كتابة المقال.
الجلسة الأولى من تقديم الدكتورة ريم سعد بعنوان “الكتابة الإثنوجرافية: تطبيق لرؤية الفلاح المصري للتاريخ والزمن”، و هنقرا فيها المقالة المرفقة (Pasts of Nasser’s Peasants) ونتعرف من خلالها على بعض جوانب المنهج الإثنوجرافي مع التركيز على استخدام المادة الأولية في إنتاج المعرفة. و زي ما اشرنا، التفاعل هيكون مهم جدا في اللقاءات المرة دي والقراءة والتحضير قبلها أساسي. دي شوية حاجات ياريت تركزوا عليها وانتو بتقروا:
أولا: تحديد الأطروحة أو السؤال البحثي الأساسي
ثانيا: تحديد الإطار النظري أو المفاهيمي
ثالثا: ما الأدلة التي استخدمتها الكاتبة لدعم الأطروحة؟ تحديد المواضع أو الجمل أو الفقرات اللي شفتوا أنها دعمت الأفكار الأساسية بشكل جيد وأيضا المواضع اللي شفتوا فيها إن الأدلة غير كافية أو غير مقنعة.
رابعا: أسلوب الكتابة واختيار الصيغ و المفردات بيلعب دور مهم عند استخدام المنهج الإثنوجرافي, وبالتالي مهم تركزوا على طريقة الكتابة وياريت مثلا تعلموا على كلمات أو صيغ معينة شفتوا إنها مهمة في توصيل الفكرة. وأيضا العكس يعني لو في صيغ أو جمل مكانتش مناسبة.
في أثناء الجلسة هتشارك الدكتورة ريم الخطوات اللي مشيت فيها في مرحلة ما بعد جمع المادة الميدانية و حتى الانتهاء من الكتابة، وهنشوف مع بعض نماذج من المدونات الميدانية اللي اعتمدت عليها في كتابة المقال و اللي بتعتبر المصادر الأولية في المنهج الإثنوجرافي. و هنعمل حاجات تانية لطيفة هنقول لكم عليها لما نشوفكم.
اللقاء الأول هيكون في جمعية النهضة – جيزويت القاهرة يوم السبت الموافق 1 فبراير 2020 من الساعة 5 م إلى 8 م.
بخصوص جدول جلسات ربيع 2020، فهي كالتالي:
جلسة 1: يوم السبت الموافق 1 فبراير 2020
جلسة 2: السبت الموافق 15 فبراير 2020
جلسة 3: السبت الموافق 29 فبراير 2020
جلسة 4: السبت الموافق 14 مارس 2020
جلسة 5: السبت الموافق 28 مارس 2020
جلسة 6: السبت الموافق 11 إبريل 2020
سكة معارف 